si lou (vamp chronicles 1)

Hindi naman siya pangit. Pero, isip niya habang nakikipagtitigan sa salamin, sana magpakita naman na iyong sigurado niyang nakatago lang niyang kagandahan. “Naghahanap pa rin ng tiyempo,” sabi niya sa sarili, “di bale baka bukas. OK lang, hindi naman ako pangit.”

Ibabalik niya uli ang salamin sa tabi ng unan at tititig naman sa kisame, makikipagtalo sa sarili kung dapat na bang bumangon o matulog pa. Yayakapin iyong kanyang pinakamalaking unan at iipit-ipitin sa kanyang hita, baka makatulong sa pagdedesisyon. Mapapapikit na rin siya dahil sa lalim ng iniisip.

“…all through the day I me mine, I me mine, I me mine…” Mapapadilat siya sa tugtog mula sa kapitbahay niyang flip at ilalagay ang isang palad sa noo. “George! George!” pailing-iling niyang titingnan ang poster sa pinto, “All things must pass George, ikaw na rin ang nagsabi. Kumusta kay Lennon, sabihin mo dalawa na lang reunion na.”

Paubos na talaga ang henerasyon ng tatay niya “kasunod na ako, demet!” Kukunot ang kaniyang noo dahil maiisip niya na baka naman mas nagmana siya sa ermats niya na kahit pati lelang ng lola niya eh buhay pa. Sana daw hindi, antingin niya kasi ay sumpa iyon sa kanila.

Biro mo nga naman lola ka na tapos may lola ka pa. Tapos ang dibersiyon mo sa buhay eh makipagtitigan sa lupa. Ilang beses niyang nakita iyon sa lelang 1, 2 and 3 niya, parang nakikipaghintayan sa lupa hanggang magkikibit balikat na babalikan ang kung anumang isang siglo na nilang ginagawa.

Inakala niya noon na baka me dugong bampira sila. Lalo na noong magsimula siyang di makatulog hangga’t di muna sumikat ang araw at magising naman sa dapithapon na. Di pa niya pansin ang puyat noon sa pag-asang tubuan din siya ng pangil tulad ni Dracula.

Nakakalat sa kama niya ang koleksyon niya ng mga black and white Dracula movies. Wala pa siyang grade 1 nang una siyang mamangha na pagkatapos maghihihiyaw nuong babae sa pelikula ay mukhang sarap na sarap naman sa pagkakakagat ni Dracula sa leeg nito. “Mamam!” sinabi niya. Kung alam lang ito ng kanyang mga naging honeypie ay maiintindihan nila kung bakit parati silang umuuwi na bugbog sa hicky (hickie?) ang leeg nila.

“Lou you’re sick,” kamay sa bewang na sinabi ni Ella sa kanya “horror iyan tandaan mo at hindi erotica.”

“Tsukuday naman! Neck, neck, neck, neck,” turo ni ni Lou sa mga sa estudyante sa canteen, “look at all those necks screaming to be bitten! A neck with a kissmark, what can be sexier than that? Kahit hindi ka na magkuwintas,” kindat niya ke Ella, “may dalawa ka lang na maliliit na butas.”

“Susme! Physical violence, dominance, submission, corruption…eh ano iyan? Di ba rape fantasy ng mga lalake? Gender-gender ka pa, baliw!”

“Hmmmm,” taas kilay at hawak sa baba, “fantasy, yes. But rape? Maybe not. Tingin ko pantasya ito ng mga orally fixated Ella. Think of the pleasure of gently sinking your canines into a soft female neck. Tapos, all the sipping and sucking and licking, hmmm, mamam di ba?” Hinawakan niya ang mga kamay ni Ella. “Or! Or with a male neck, di ba the vampires would take a deep hard bite and just fucking tear the flesh out, gorge and have a bloody feast? Siyet, juicylicious! Mamam din yon!”

“Kailangan mo na naman ng pampakalma Lou, tsaka pasensya ka na absent ata ako sa Psych nuong tinuro iyan."

"At tandaan mo,” patuloy ni Lou, “vampire fantasies are bisexual. Walang pagtatangi sa kasarian ng leeg. Pero dahil erotica nga..as you said..din ito, I’m sure vampires are gorging out on chunky pieces of sexy male asses too.”

“Or some other ‘meaty’ body part.” sabi naman ni Ella, resigned na sa kaweirdohan ng kaibigan.

“Precisely! And...” sabay tingin niya sa mga mata ni Ella, “...habang sinisipsip na ni Dracula iyong leeg ng babae eh..di lang pinapakita sa movies dahil ‘horror’ nga dapat ayon din sa iyo..eh I’m definitely sure he’s got his hand on her breast and tweaking her nipples.”

“At saan naman iyong isang kamay niya?”

“You really want to know?” tanong ni Lou sabay ngiti ng kalahati.

“Never mind.” taas ni Ella ng mga kamay niya.

“Magulo buhok mo, I-ponytail mo na kaya?” inosenteng binanggit ni Lou.

“Ulol!”

Hindi siya tinubuan ng pangil, pero nagpatuloy ang insomnia niya. “Vampire hours sans the fangs!” parati niyang reklamo. Lampas na naman ng tanghali, mainit na sa kanyang pakiramdam para mag-mamam pa sa kama, napalampas na naman niya iyong lamig sa umaga. Sayang.

Masisipa niya iyong gitarang nakatulugan niya sa pag-aral ng lick ni Clapton sa “While my guitar gently weeps” kaninang madaling araw. Babangon para maupo sa kama, hahanapin ang pantali sa buhok sa ilalim ng mga unan, kumot, libro, tablatures, CDs, VCDs, tasa…makikita niya sa ilalim ng salamin. May limang missed calls siya at isang text. Galing ke Maria: Lestat gising na! Sent: 9-Dec-2001 10:25:13.

Itutuloy niya ang pagbangon. Lilipat naman sa upuan niyang leather, tutunganga at mapapatingin uli sa kama. Kukunot ang noo at kukuyom ang mukha, “Tasa? Bakit may tasa?”